2. kafli: Austurströnd Bandaríkjanna

New York, Bandaríkin Á sjó Fort Lauderdale, Bandaríkin

16. og 17. janúar: New York. Times Square, Empire State o.fl.

Byrjuðum á að fara í vegabréfaskoðun, fingrafaratöku og myndatöku. Fékk á tilfinninguna að hér byggi hrædd stórþjóð í eigin fangelsi. Pínulítið móðgaður að fá inngöngu í Bandaríkin þegjandi og hljóðalaust, hélt að ég væri miklu hættulegri kommi en þetta.

Skipið lagðist að Manhattan Cruise Terminal þannig að miðbærinn var í göngufæri, enda tókum við hvorki leigubíl, strætó né "subway". Okkur taldist til að við hefðum gengið samtals um 10 kílómetra báða dagana. Fórum í Central Park, Times Square og Empire State Building fyrri daginn en Ripley's believe it or not seinni daginn (innifalið í miða í ESB). Óþolandi þetta kerfi þeirra að gefa upp öll verð án skatts og þjónustugjalda. Gengum í slíka gildru fyrri daginn þar sem hádegismaturinn fór upp í 80 dollara með öllum ófyrirséðum aukagjöldum.

Central Park:

Times Square:

Empire State Building:

Kvöldmyndir teknar frá skipinu:

Ripley's:

Á leiðinni til Fort Lauderdale sigldum við gegnum golfstrauminn í um 18 gráðu heitum sjó en lofthitinn var um frostmark. Afleiðingin var mikil þokumyndun og nú skilur maður betur hvernig þessar risalægðir myndast á þessum sklóðum og æða síðan norður með austurströndinni og valda snjóstormi í New York og víðar.

20. janúar: Fort Lauderdale. Allígatorar og flamingóar í Everglades fenjunum.

Fórum í skoðunarferð í Everglades fenin og dýragarð, sem heitir Flamingo Park. Í fenjunum sigldum við um í fenjabát (þvílíkur hávaði!) í um klukkustund. Þar sáum við aðeins einn allígator en stýrimaður bátsins sagði okkur að vegna mikilla kulda í ársbyrjun (fór niður fyrir frostmark í norður Flórída) héldu dýrin sig að mestu í kafi. Ég hef reyndar grun um að eitthvað af þessum kaldablóðsdýrum hafi hreinlega drepist.

Myndir frá Everglades: